Foto: “Uzbekistan Airports”

Skytrax tomonidan yetti marta dunyoning eng yaxshi aviakompaniyasi deb topilgan “Qatar Airways” Oʻzbekistonga muntazam qatnovlarni yoʻlga qoʻydi. Bu haqda Transport vazirligi matbuot xizmati xabar berdi.

Maʼlum qilinishicha, dastlabki bosqichda ushbu yoʻnalishda aviakompaniya haftasiga 4-marta – dushanba, seshanba, payshanba va shanba kunlari parvozlarni amalga oshiradi. Keyingi bosqichda esa har kuni reyslar amalga oshirilishi rejalashtirilgan.

“Muntazam reysning yoʻlga qoʻyilishi mamlakatlarimiz oʻrtasida sayyohlik almashinuvi oʻsishiga sezilarli hissa qoʻshishi, qolaversa, Fors koʻrfazi va Markaziy Osiyo oʻrtasida koʻp qirrali hamkorlikni rivojlantirishga xizmat qilishi bilan ahamiyatlidir”, deyiladi vazirlik xabarida.

“Uzbekistan Airports” xabariga koʻra, bugun, 2-iyun kuni soat 10:28 da “Qatar Airways” aviakompaniyasiga tegishli Airbus 320 samolyoti Doha aeroportidan havoga koʻtarilgan va soat 13:30 da Toshkent aeroportiga qoʻngan. Parvoz vaqti 3 soatni tashkil qilgan.

“Qatar Airways” aviakompaniyasining sharqiy hududlar boʻyicha bosh vitse-prezidenti Marvan Koleylat kelgusida Dohadan Samarqand va Buxoro shaharlariga ham muntazam parvozlarni yoʻlga qoʻyish masalasi koʻrib chiqilayotganini maʼlum qilgan.

Maʼlumot uchun, aviakompaniya hozirda dunyoning 170 dan ortiq yoʻnalishlariga parvozlarni amalga oshirib kelmoqda.