Qashqadaryo viloyatining Gʻuzor tumanida YPX xodimiga faol qarshilik koʻrsatgan Cobalt haydovchisi qamoqqa olindi. Bu haqda IIV matbuot xizmati xabar berdi.

“Zamon” informatsion dasturida maʼlum qilinishicha, belgilangan hududda xizmat olib borayotgan IIO xodimi toʻxtash taqiqlangan joyda qoldirib ketilgan “Cobalt” avtomashinasi haydovchisidan hujjatlarini taqdim etishini soʻragan.

Biroq fuqaro xodimning qonuniy talabiga boʻysunmasdan, janjal koʻtargan va mashinaga oʻtirib, voqea joyidan qochib ketishga uringan. Shu vaqtda YPX inspektorlari haydovchini qonun talablariga boʻysunishga chaqirib, avtomashinadan tushirgan. Bundan gʻazablangan fuqaro xodimlariga nisbatan kuch ishlatib, janjal keltirib chiqargan.

“YPX xodimlariga boʻysunmay qochishga harakat qildim. Ular meni mashinadan tushirib olishgani sababli jahlim chiqib, janjallashib ketdim. Hammadan uzr soʻrayman”, deydi haydovchi.

Qayd etilishicha, hozirda qoidabuzar haydovchining avtomobili jarima maydoniga qoʻyilgan. Fuqaroning oʻziga esa Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik koʻrsatish) 2-qismi bilan jinoyat ishi qoʻzgʻatilgan.