Qamchibek Tashiyev Qirgʻiziston Milliy xavfsizlik davlat qoʻmitasi raisi lavozimidan ozod etilgani haqidagi qaror u uchun “kutilmagan” boʻlganini maʼlum qildi. Uning murojaati tarafdorlari tomonidan ijtimoiy tarmoqlarda eʼlon qilindi, deb yozadi 24.kg.

Qamchibek Tashiyevning soʻzlariga koʻra, u avval oʻtkazilgan jarrohlik amaliyotidan keyin tibbiy koʻrikdan oʻtish uchun prezident ruxsati bilan xorijga chiqqan. U lavozimidan ozod etish toʻgʻrisidagi qarorni kutmaganini taʼkidlagan.

Shu bilan birga, u har qanday holatda ham davlat rahbarining qarori ijro etilishi lozimligini qayd etgan.

“Men davlatimizga, xalqimizga va prezidentga halol xizmat qildim va bundan faxrlanaman. Afsuski, shaxsiy tarkib bilan xayrlashish imkoni berilmadi. MXDQning har bir xodimiga minnatdorlik bildiraman va ularga muvaffaqiyat tilayman”, deyiladi murojaatda.

Murojaat yakunida Qamchibek Tashiyev fuqarolarni qonunlarga rioya qilishga va noqonuniy harakatlarga yoʻl qoʻymaslikka chaqirib, mamlakatda tinchlik va barqarorlikni saqlash muhimligini urgʻulagan.

Maʼlumot uchun, Qirgʻiziston Milliy xavfsizlik davlat qoʻmitasi (MXDQ) raisi vazifasini vaqtincha Jumgalbek Shabdanbekov bajaradi.