Namangan xalqaro aeroportida qalin tuman tufayli koʻrinishning pasayib ketishi (50 m) reyslarni qabul qilish va joʻnatishini cheklab qoʻydi. Shu sababli, ikkita reys muqobil aerodromlarga joʻnatildi.

Xususan, noqulay ob-havo sharoiti tufayli “Uzbekistan Airways” aviakompaniyasining Ufa-Namangan yoʻnalishi boʻyicha HY9958 reysi mahalliy vaqt bilan soat 07:15 da Toshkent aeroportiga qoʻndi. Shuningdek, Jazeera Airways aviakompaniyasining J9645 reysi (Quvayt — Namangan) ham poytaxt aeroportiga yoʻnaltirildi.

Koʻrinishning pastligi Red Wings WZ1127 (Yekaterinburg-Namangan) reysi kutish zonasiga yuborilishiga sabab boʻldi. Samolyot mahalliy vaqt bilan soat 07:30 da belgilangan aeroportga qoʻnishi kerak edi.

“Uzbekistan Airways” aviakompaniyasining HY9825 (Namangan-Sochi) va HY9823 (Namangan-Ufa), shuningdek, Flydubai FZ781 (Dubay-Namangan) reyslari Namangan xalqaro aeroportida ob-havo yaxshilanguniga qadar kechiktirildi.