Foto: Prezident matbuot xizmati

Shavkat Mirziyoyev Parij Olimpiadasida oʻz vazn toifalarida barcha raqiblarini magʻlub etib, oltin medallarni qoʻlga kiritgan hamda ikki karra olimpiya chempioniga aylangan taekvondochi Ulugʻbek Rashitov va bokschi Hasanboy Doʻsmatov bilan telefon orqali muloqot qildi.

Davlatimiz rahbari sportchilarni qizgʻin tabriklab, terma jamoamiz tomonidan bir kun ichida Olimpiadaning ikkita oltin medali qoʻlga kiritilgani Oʻzbekiston sporti uchun tarixiy voqea boʻlganini katta mamnuniyat bilan qayd etdi. Yigitlarimizning dadil va ishonchli chiqishlari, yuksak mahorati va mardligi chinakam qahramonlik namunasi boʻlgani, Yangi Oʻzbekistonning yoshlari nimalarga qodir ekanini koʻrsatgani, xalqimizga ulkan kuch va gʻurur bagʻishlaganini taʼkidladi. Murabbiylari, ota-onasi va yaqinlariga minnatdorlik bildirdi.

Ulugʻbek Rashitov va Hasanboy Doʻsmatov alohida eʼtibor va yuksak ishonch, sportchilarga barcha sharoitlar yaratilgani uchun davlatimiz rahbariga tashakkur izhor etib, gʻalabalarini Yangi Oʻzbekistonga bagʻishlashlarini aytdilar.