Avvalroq, Shavkat Mirziyoyev raisligida ilm-fan va innovatsiyani rivojlantirish borasida oliy taʼlim muassasalari, ilmiy tashkilotlar, tarmoq va hududlar oldidagi ustuvor vazifalar muhokamasi yuzasidan videoselektor yigʻilishi oʻtkazilgani haqida xabar bergan edik.

Unda Prezident innovatsion ishlanmalar uchun ajratilgan mablagʻlar haqida maʼlumot berdi.

«Ilm-fan va innovatsiya, ilmni amalda joriy etish boʻyicha koʻp qarorlar qabul qildik. Innovatsiya vazirligi tuzdik. Nima tajribaga erishdik va oldimizda nima masalalar koʻndalang turibdi. Bugungi yigʻilishdan maqsadimiz har bitta tarmoqni rahbari oʻzini oldida savol bersin.

Mana shu yangi tashkil qilingan 28 ta ilmiy tadqiqot institutlari bilan akademiyamiz bilan, Innovatsiya vazirligi bilan muloqot qanday. Hududni rahbarlari, hokimlar necha marta akademiyani yigʻilishini oʻtkazdi. Andijonda, Fargʻonada, Surxondaryoda qaysi olimlar bilan hamkorlik tuzildi, degan savol mani, albatta, bezovta qiladi. Shuning uchun bugun aniq, aniq masalalarni yechib olishimiz kerak. Bugungi kunda 100dan ziyod ilmiy tashkilotlar faoliyatida ular tomonidan olib borilayotgan izlanishlarda sezilarli oʻzgarishlar hali yoʻq desak toʻgʻri boʻladi.

Innovatsion ishlanmalar uchun byudjetdan 100 milliard soʻm ajratilgan boʻlsada, tanlov natijalari boʻyicha bor-yoʻgʻi 29 milliard soʻmga 51 ta loyiha shakllantirildi, xolos", dedi davlat rahbari.