Senat ishchi guruhi tomonidan dorivor oʻsimliklarni yetishtirish, qayta ishlash, ularga kvota ajratish, sohada ilmiy tadqiqotlar olib borish yuzasidan yuborilgan parlament soʻrovi natijalari Samarqand viloyati misolida oʻrganildi.

Oʻrganish davomida “Zarafshon” milliy tabiat bogʻida noyob flora va fauna vakillarini muhofaza qilish borasida olib borilayotgan ishlar bilan tanishildi.

Taʼkidlanganidek, parlament soʻrovida aks etgan masalalar boʻyicha muayyan ishlar amalga oshirilgan.

Dorivor oʻsimliklarning tabiiy zaxiralarini aniqlash, ularning kadastrini yuritishning elektron tizimini joriy etish hamda kvota ajratishda ochiqlik va shaffoflikni taʼminlashga eʼtibor qaratilgan.

“Zarafshon” milliy tabiat bogʻining umumiy yer maydoni 2,4 ming gektarni tashkil etib, mazkur bogʻda qimmatbaho dorivor oʻsimliklar landshaftlari kengaytirilmoqda.

Shuningdek, bogʻ hududida Oʻzbekiston Respublikasi Qizil kitobiga kiritilgan oʻsimliklar parvarishlanmoqda.

Bundan tashqari, tabiat bogʻida 80 dan ziyod dorivor va 23 tur texnik oʻsimliklar, 73 tur zamburugʻlar hamda 33 tur suv oʻtlari mavjud.

Oʻrganish davomida dorivor oʻsimliklarga oid fundamental va amaliy tadqiqotlar olib borish, ilmiy ishlanmalar natijalarini tijoratlashtirish hamda ilgʻor xorijiy tajribalarni oʻrganish va amaliyotga tatbiq etish boʻyicha ishlarni kuchaytirish yuzasidan mutaxassislar bilan fikr almashildi.

Shuningdek, dorivor oʻsimliklarni yetishtirish, qayta ishlash, ularga kvota ajratish hamda sohada ilmiy tadqiqotlar olib borish boʻyicha masʼullarga tegishli taklif va tavsiyalar berildi.