Illyustrativ foto

“XALQ SOʻZI ONLINE”. Saminjon Husanov/Andijon . Paxtaobodlik D.M.muqaddam ikki marta sudlanganligiga qaramay, uchinchi bor jinoyatga qoʻl urdi. Bu gal oʻzi mehnat qilayotgan xoʻjalikdan bir gektar maydonni fuqaro T. A.ga poliz ekinlari ekish uchun ajratib berish vaʼdasi bilan 3 million 200 ming soʻmga “sotdi”.Biroq belgilangan vaqt boʻlsada, yer ajratib berilmaganidan shubha qila boshlagan fuqaro huquqni muhofaza qilish idoralariga murojaat etibgina ayolning qilmishlaridan voqif boʻldi. Surishtiruv davomida maʼlum boʻlishicha, firibgar yana ikki nafar ayollarni chuv tushirib, oʻzlashtirilgan mablagʻni ehtiyoji yoʻlida sarflab yuborgan ekan.

Jinoyat ishlari boʻyicha viloyat sudi sudya katta yordamchisi Kamronshox Rasulovning maʼlum qilishicha, fermer ayolga nisbatan 2 yilu 6 oy muddatga ozodlikni cheklash jazosi tayinlandi. Shuningdek, jabrlanuvchiga yetkazilgan moddiy zarar toʻliq qoplanibgina qolmasdan, uning foydasiga 5 million 160 ming soʻm moddiy zarar undirib berildi.

3 million 200 ming soʻmga yer sotaman deb, ozodlikni cheklash jazosini “sotib olgan” ayol qilmishidan pushaymon. Oʻz vaqtida nafsini jilovlab olganida edi uchinchi marta sudning qora kursisidan joy olmagan boʻlardi.