Las-Vegas shahrida shaxmat boʻyicha nufuzli “Freestyle Chess Grand Slam” turnirining uchinchi bosqichi boshlandi. Bu musobaqa shaxmatning anʼanaviy qoidalariga oʻzgacha yondashuvni talab qiladigan, innovatsion formatdagi bellashuvlardan iborat boʻlib, jahonning eng kuchli grossmeysterlarini bir joyga jamlagan. Unda Oʻzbekiston sharafini himoya qiluvchi ikki shaxmatchi — Nodirbek Abdusattorov va Javohir Sindarov ham ishtirok etmoqda.

Tungi sessiyada oʻtkazilgan guruh bosqichi bellashuvlarida yurtdoshlarimiz “Oqlar guruhi”da muvaffaqiyatli ishtirok etishdi. Nodirbek Abdusattorov va Javohir Sindarov 7 tadan oʻyin oʻtkazib, har biri 4,5 ochkodan toʻplashga muvaffaq boʻldi. Bu natija ularga pley-off — gʻoliblar yoʻlidagi chorak final bosqichiga yoʻl olish imkonini berdi.

Chorak finalda Nodirbek Abdusattorov Hindiston shaxmat maktabining yosh va isteʼdodli vakili Arjun Erigaisiga qarshi bellashdi. Ikkita partiyadan iborat duelda Nodirbek 0,5 : 1,5 hisobida magʻlubiyatga uchradi va musobaqaning gʻoliblar yoʻlidan chiqib ketdi. Javohir Sindarov esa amerikalik Hans Niyemannga qarshi dona surdi. Asosiy ikki partiyada natija 1:1 hisobida yakunlandi. Ammo tay-brek bahslarida Javohir 1:3 hisobida imkoniyatni boy berdi.

Shu tariqa, ikki hamyurtimiz ham chorak finalda oʻz yurishlarini toʻxtatishdi va musobaqaning gʻoliblar yoʻlidan chiqarildi. Endi ular musobaqada magʻlublar yoʻli orqali oʻz ishtiroklarini davom ettiradilar. Bu yoʻl orqali ham asosiy finalga chiqish imkoniyati mavjud boʻlib, ulardan keyingi bellashuvlarda yuqori natijalar kutilmoqda. Yurtdoshlarimizga omad tilaymiz!