Abdulaziz YOʻLDOSHEV/“Xalq soʻzi”. Samarqand Oʻzbekiston—Xitoy ikkinchi hududlararo forumiga mezbonlik qilyapti. Ushbu anjumanda ikki tomon hukumat aʼzolari, hududlar rahbarlari va tadbirkorlar ishtirok etmoqda.

Forumning ochilish marosimida Oʻzbekiston Respublikasi Bosh vazirining oʻrinbosari Jamshid Xoʻjayev, Xitoy Xalq Siyosiy maslahat Kengashining 14-chaqiriq yigʻilishi raisining oʻrinbosari, SHHTning qoʻshnichilik, doʻstlik va hamkorlik boʻyicha Xitoy qoʻmitasi raisi Shen Yueyue xonim, Samarqand viloyati hokimi vazifasini bajaruvchi Adiz Boboyev soʻzga chiqib, Oʻzbekiston va Xitoy oʻrtasidagi savdo-iqtisodiy, madaniy-gumanitar hamkorlik aloqalari rivojlanib borayotganligini taʼkidladi.

Tadbir doirasida Savdo-iqtisodiy hamkorlik, innovatsiyalar va yashil iqtisodiyot boʻyicha biznes-forum oʻtkazilmoqda. Panel sessiyalar davomida Taʼlim va texnologiyalar sohasida innovatsion hamkorlik forumi, Zamonaviy qishloq xoʻjalik forumi va Ayollarning innovatsiyalar va tadbirkorlik sohasidagi hamkorlik forumi ham boʻlib oʻtyapti.

Bundan tashqari, ikki mamlakat milliy mahsulotlari koʻrgazmasi tashkil etilgan. Bugungi forumda qator istiqbolli hamkorlik bitimlari imzolanishi kutilmoqda.