Абдулазиз ЙЎЛДОШЕВ/«Халқ сўзи». Самарқанд Ўзбекистон—Хитой иккинчи ҳудудлараро форумига мезбонлик қиляпти. Ушбу анжуманда икки томон ҳукумат аъзолари, ҳудудлар раҳбарлари ва тадбиркорлар иштирок этмоқда.

Форумнинг очилиш маросимида Ўзбекистон Республикаси Бош вазирининг ўринбосари Жамшид Хўжаев, Хитой Халқ Сиёсий маслаҳат Кенгашининг 14-чақириқ йиғилиши раисининг ўринбосари, ШҲТнинг қўшничилик, дўстлик ва ҳамкорлик бўйича Хитой қўмитаси раиси Шэнь Юэюэ хоним, Самарқанд вилояти ҳокими вазифасини бажарувчи Адиз Бобоев сўзга чиқиб, Ўзбекистон ва Хитой ўртасидаги савдо-иқтисодий, маданий-гуманитар ҳамкорлик алоқалари ривожланиб бораётганлигини таъкидлади.

Тадбир доирасида Савдо-иқтисодий ҳамкорлик, инновациялар ва яшил иқтисодиёт бўйича бизнес-форум ўтказилмоқда. Панель сессиялар давомида Таълим ва технологиялар соҳасида инновацион ҳамкорлик форуми, Замонавий қишлоқ хўжалик форуми ва Аёлларнинг инновациялар ва тадбиркорлик соҳасидаги ҳамкорлик форуми ҳам бўлиб ўтяпти.

Бундан ташқари, икки мамлакат миллий маҳсулотлари кўргазмаси ташкил этилган. Бугунги форумда қатор истиқболли ҳамкорлик битимлари имзоланиши кутилмоқда.