2025-yilning yanvar–aprel oylarida Oʻzbekistonda jami 29 ming 134 ta yangi korxona va tashkilot (fermer va dehqon xoʻjaliklarisiz) tashkil etilgan. Bu oʻtgan yilning shu davriga nisbatan 5,2 foizga koʻp boʻlib, mamlakatda tadbirkorlik va iqtisodiy faollik darajasining ortib borayotganini koʻrsatmoqda.

Yangi tashkil etilgan korxonalar soni boʻyicha Toshkent shahri yetakchilik qilmoqda. Mazkur davr mobaynida poytaxtda 6 ming 363 ta yangi korxona roʻyxatdan oʻtgan. Bu umumiy koʻrsatkichning qariyb beshdan bir qismini tashkil etadi.

Toshkent shahridan keyin ikkinchi oʻrinda Toshkent viloyati turibdi – bu hududda 2 ming 743 ta yangi korxona tashkil etilgan. Uchinchi oʻrinda esa Fargʻona viloyati – bu yerda 2 ming 558 ta yangi subyekt faoliyat boshlagan.

Keyingi oʻrinlarda mos ravishda Xorazm viloyati (2 ming 464 ta), Samarqand viloyati (2 ming 202 ta), Qashqadaryo viloyati (1 ming 858 ta), Buxoro viloyati (1 ming 810 ta) hamda Surxondaryo viloyati (1 ming 720 ta) joylashgan. Bu hududlarda ham tadbirkorlik faolligi yuqoriligicha qolmoqda.

Bundan tashqari, Andijon viloyatida – 1 ming 512 ta, Namangan viloyatida – 1 ming 387 ta, Qoraqalpogʻiston Respublikasida – 1 ming 370 ta, Jizzax viloyatida – 1 ming 303 ta, Navoiy viloyatida – 1 ming 160 ta hamda Sirdaryo viloyatida – 684 ta yangi tashkilotlar roʻyxatdan oʻtgan.

Ushbu statistik koʻrsatkichlar soʻnggi yillarda mamlakatda kichik biznes va xususiy tadbirkorlikni qoʻllab-quvvatlash, qulay ishbilarmonlik muhiti yaratish yoʻlida olib borilayotgan tizimli islohotlar oʻz samarasini bermoqda, deya baholanishi mumkin.