Videodan kadr

Davlat xavfsizlik xizmati raisi Bahodir Qurbonov Xavfsizlik Kengashining 13-yanvar kuni oʻtkazilgan kengaytirilgan yigʻilishida Oʻzbekiston Prezidenti, Qurolli Kuchlar Oliy Bosh Qoʻmondoni Shavkat Mirziyoyevga chegara qoʻshinlarining texnik jihozlanish darajasi haqida maʼlumot berdi.

Uning qayd etishicha, mamlakatimiz chegaralarida Turkiyaning “Bayraktar” uchuvchisiz uchish apparatlari bilan butlangan yangi maxsus boʻlinmaning jangovar navbatchiligi yoʻlga qoʻyilgan. Shuningdek, koʻrilgan chora-tadbirlar natijasida jangovar tayyorgarlik tadbirlarining intensivligi va sifat koʻrsatkichlari oshirilgani qayd etilgan.

Xususan, qurolli kuchlarning jangovar tayyorgarligini oshirish boʻyicha koʻrsatmalarni amalga oshirish doirasida DXXda boʻlinmalar va davlat xavfsizlik organlarining jangovar tayyorgarligi va tayyorgarligini takomillashtirish boʻyicha tizimli ishlar tashkil etilgan.

DXX raisining soʻzlariga koʻra, davlat chegarasini qoʻriqlash tizimiga zamonaviy raqamli yechimlarni joriy etish doirasida chegara chiziqlarining 42 foizi videokuzatuv tizimi bilan jihozlangan. Bundan tashqari, 1117 kilometr optik tolali aloqa liniyalari yotqizilgan.

Qoʻshimcha qilinishicha, davlatimiz Chegara qoʻshinlari zirhli avtotexnika bilan 98 foiz, suzish vositalari bilan 86 foiz, qurol-aslaha va oʻq-dorilar bilan 100 foiz, elektron-optik vositalar bilan 78 foiz taʼminlangan.