Oʻzbekistonda Alisher Navoiy ordeni taʼsis etiladi

18:04 19 Oktyabr 2020 Madaniyat
420 0

Prezidentning tegishli qaroriga koʻra, 2021-yilda buyuk shoir va mutafakkir Alisher Navoiy tavalludining 580-yilligi keng nishonlanadi.

Qarorga koʻra:

Alisher Navoiy hayoti va ijodini mamlakatimiz va xalqaro miqyosda keng oʻrganish va targʻib qilish maqsadida Alisher Navoiy nomidagi xalqaro jamoat fondi tashkil etiladi;

Alisher Navoiyning ijodiy merosini chuqur oʻrganish va ommalashtirishga ulkan hissa qoʻshgan mamlakatimiz va xorijiy davlatlar fuqarolarini hamda ilmiy-ijodiy muassasalarini taqdirlash maqsadida Alisher Navoiy ordeni taʼsis etiladi;

xorijiy davlatlarda saqlanayotgan Alisher Navoiy qalamiga mansub va u yashagan davrga oid qoʻlyozmalarning faksimile nusxalarini mamlakatimizga olib kelish choralari koʻriladi;

Alisher Navoiy hayoti va ijodiy merosini tadqiq etish boʻyicha ilmiy tadqiqot ishlariga davlat buyurtmasi talablariga muvofiq ilmiy loyihalar tanlovi eʼlon qilinadi;

2021-yil oxiriga qadar Oʻzbekiston Milliy kutubxonasida Alisher Navoiy asarlari hamda navoiyshunoslik fani boʻyicha amalga oshirilgan ilmiy tadqiqotlarning elektron platformasi yaratiladi;

2021-yilda Toshkent shahrida Alisher Navoiy nomidagi ijod maktabi tashkil etiladi;

2021-yil noyabr oyining birinchi oʻn kunligida Navoiy shahrida “Alisher Navoiy ijodiy merosining bashariyat maʼnaviy-maʼrifiy taraqqiyotidagi oʻrni” mavzusidagi xalqaro ilmiy-amaliy konferensiya tashkil etiladi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?