Bu haqda “Oʻzbekkino” maʼlum qildi.
Qayd etilishicha, 2019-yilda 12 ta multfilmni yaratish uchun “Oʻzbekkino” Milliy agentligiga 4 milliard 458 million soʻm miqdoridagi byudjet mablagʻi ajratildi. Ushbu mablagʻ quyidagicha taqsimlandi: 76,24 foiz (3 milliard 400 million soʻm) mablagʻ 2019-yilda 9 ta multfilm ishlab chiqargan davlat multimedia studiyasiga berildi (ularning 4 ta multfilmi ustidagi ishlar 2020-yilda ham davom etiriladi), qolgan 23,76 foizi (1 milliard 59 million soʻm) mablagʻ 3 ta multfilm yaratgan xususiy ishlab chiqaruvchilarga ajratildi.

Shu munosabat bilan, “Oʻzbekkino” Milliy agentligining 2020-yildagi ilk va muhim qadami film ishlab chiqarish, shu jumladan, animatsion filmlarni yaratishga ajratiladigan byudjet mablagʻlarini taqsimlash tamoyillariga oʻzgartishlar kiritgani boʻldi. 
2020-yildan eʼtiboran barcha film loyihalari faqat tender asosida koʻrib chiqiladigan boʻldi. Masalan, joriy yilda “Oʻzbekkino” Milliy agentligi qoshidagi Badiiy kengash 3 ta multfilm ishlab chiqish uchun qarorni aynan eʼlon qilingan tender natijalariga asosan qabul qildi. Ulardan bittasi davlat studiyalari tomonidan, 2 tasi xususiy studiyalar tomonidan suratga olinadigan boʻldi. Byudjet mablagʻlarini xolisona tanlov asosida koʻrib chiqish va odilona taqsimlash raqobat muhitini yaratadi, pirovardida yaratilayotgan mahsulotlarning darajasi va sifatini oshirishga keng imkoniyat yaratiladi.