Bugun, 22-yanvar kuni Oʻzbekiston mudofaa vaziri general mayor Shuhrat Xolmuhamedov rasmiy tashrif bilan kelgan Rossiya mudofaa vaziri Andrey Belousov bilan uchrashdi.

Mudofaa vazirligi markaziy apparatida oʻtkazilgan ikki tomonlama hamkorlik uchrashuvida general mayor Shuhrat Xolmuhamedov delegatsiya aʼzolarini Oʻzbekistonga uyushtirgan tashrifi bilan qutlab, Oʻzbekiston va Rossiya oʻrtasida koʻplab sohalarda olib borilayotgan hamkorlik ishlari aloqalarni yanada mustahkamlashga xizmat qilayotganini taʼkidladi.

Delegatsiya rahbari bilan Oʻzbekiston-Rossiya hamkorligining mudofaa sohasidagi bugungi holati va uni rivojlantirish istiqbollari muhokama qilindi.

Uchrashuv soʻngida mudofaa vazirlari tomonidan Rossiya va Oʻzbekiston mudofaa vazirliklari oʻrtasidagi 2025-yil uchun hamkorlik rejasi hamda Oʻzbekiston va Rossiya oʻrtasida 2026-2030-yillarga moʻljallangan harbiy sohadagi strategik hamkorlik dasturi imzolandi.

Rasmiy qabuldan soʻng Rossiya Federatsiyasi mudofaa vaziri Andrey Belousov boshchiligidagi harbiy delegatsiya vakillari “Gʻalaba bogʻi” yodgorlik majmuasiga tashrif buyurgan.