Joriy yilning 1-dekabr kuni Oʻzbekiston va Ispaniya parlamentlararo guruhining onlayn uchrashuvi boʻlib oʻtdi.

Uchrashuvda ikki davlat oʻrtasidagi doʻstona aloqalarni yanada mustahkamlash, strategik sheriklikni chuqurlashtirish va parlamentlararo muloqotni kengaytirish masalalari atroflicha muhokama qilindi.

Taʼkidlanganidek, soʻnggi yillarda ikki tomonlama iqtisodiy hamkorlik faollashib borayotganligi, infratuzilma, sanoat va innovatsiya yoʻnalishlarida hamkorlikda 800 mln dollar miqdorida yirik investitsiya loyihalari amalga oshirilmoqda.

Shuningdek, oliy taʼlim tashkilotlari oʻrtasida 32 ta qoʻshma loyiha amalga oshirilayotganligi, oʻtgan yili Ispaniyadan Oʻzbekistonga 23,6 ming sayyoh tashrif buyurgani alohida taʼkidlandi.

Parlamentlararo muloqot oʻzbek-ispan munosabatlarining muhim asosi ekanligi qayd etildi hamda dolzarb takliflar ilgari surildi.

Ikki mamlakat parlamentlari tegishli qoʻmitalari va komissiyalari delegatsiyalari ishtirokida qonunchilik sohasida muntazam fikr va tajriba almashish amaliyotini joriy etish, parlamentlararo hamkorlikning qoʻshma rejalarini ishlab chiqish, Yoshlar parlamentini rivojlantirish boʻyicha tajriba oʻrganish, qishloq xoʻjaligi, suvni tejovchi texnologiyalardan foydalanishda hamkorlik olib borish shular jumlasidandir.