Oʻzbekiston Respublikasi Tashqi ishlar vazirligi Tailand va Kambodja oʻrtasidagi chegarada yuz bergan qurolli toʻqnashuv yuzasidan bayonot eʼlon qildi.

Unda aytilishicha, Oʻzbekiston Respublikasi Tashqi ishlar vazirligi yuzaga kelgan vaziyatni diqqat bilan kuzatib bormoqda.

“Biz barcha tomonlarni vaziyatni tinch yoʻl bilan hal qilishga va xalqaro huquq normalariga rioya qilishga chaqiramiz. Vazirlik vatandoshlarimiz xavfsizligini taʼminlash uchun barcha zarur choralarni koʻrishda davom etadi. Fuqarolarimizdan Kambodja bilan chegaradosh hududlarga safar qilmaslikni va rasmiy xabarlarni kuzatib borishni soʻraymiz”, — deyiladi TIV bayonotida.

Oʻzbekistonning Bangkokdagi Bosh konsulxonasi maʼlumotlariga koʻra, hozirgi vaqtda Tailand va Kambodjada istiqomat qilayotgan Oʻzbekiston fuqarolari orasida jabrlanganlar mavjud emas. Tailand poytaxti va turizm markazlarida vaziyat barqaror boʻlib, xorijiy sayyohlar uchun xavf-xatarlar yoʻq.

Shuningdek, favqulodda vaziyatlarda Bangkokdagi Bosh konsulxonaning (+66-2) 675-3995 yoki (+66-2) 675-3996 raqamlari orqali murojaat qilishlari eslatib oʻtilgan.