Foto: Davronbek Ernazarov/“Xalq soʻzi”

Kecha, 23-iyul kuni Oʻzbekiston Respublikasi Kriminologiya tadqiqot institutida “Jinoyatchilikni ilmiy tadqiq qilishning dolzarb masalalari” mavzusida matbuot anjumani boʻlib oʻtdi.

​

​

Mazkur tadbir institut faoliyati, ilmiy-amaliy tadqiqot loyihalari, jinoyatchilik tendensiyalarining tahlili va zamonaviy kriminologik tahdidlar yuzasidan jamoatchilikni xabardor qilish, mavjud muammolar va istiqboldagi chora-tadbirlar yuzasidan ochiq muloqotni taʼminlashdan iborat boʻldi.

​

​

​

Hozirda Kriminologiya tadqiqot instituti tomonidan 15 ga yaqin, xususan Germaniya, Turkiya, Janubiy Koreya, Rossiya va boshqa xorijiy davlatlardagi kriminologiya institutlari, jinoyatchilikni tadqiq qilish markazlari bilan hamkorlik yoʻlga qoʻyilgan. Tadbirda ushbu davlatlarda jinoyatchilikka qarshi kurashishning ilgʻor amaliyoti, jumladan kiberjinoyatchilik, voyaga yetmaganlar jinoyatchiligi va reabilitatsiya dasturlari boʻyicha tajribalar namoyish etildi.

​

​

​

Ishtirokchilar jinoyatchilik boʻyicha statistik tahlillar, soʻrovnomalar, ilmiy prognozlar va kriminogen hududlarni aniqlash boʻyicha olib borilgan tadqiqotlar natijalari hamda jinoyatchilikning omillarini aniqlashdagi innovatsion yondashuvlar bilan tanishdi.

​

​

​

Shuningdek, institut tomonidan nashr etilgan kriminologik jurnallar, ilmiy maqolalar, uslubiy qoʻllanmalar, axborot varaqalari va ijtimoiy foydali bukletlar taqdim etildi. “Kriminologik faoliyat” milliy va “Kriminologiya” xalqaro jurnalining yangi soni, voyaga yetmaganlar bilan ishlashga doir metodik tavsiyalar taqdim qilindi.

​

​

Bundan tashqari, ushbu anjuman davomida mehmonlarga jinoyatlarni tahlil qilishda qoʻllanilayotgan texnologik vositalar: elektron nazorat tizimlari, smart-brasletlar, interaktiv monitoring paneli va kelgusidagi sunʼiy intellekt asosida jinoyat prognozi boʻyicha ishlanmalar haqida ham maʼlumotlar berildi.

Davronbek ERNAZAROV, Otabek SAIDAHMADOV

“Xalq soʻzi”