Oʻzbekiston Respublikasi Prezidenti Shavkat Mirziyoyev 5-may kuni qoʻshma Hukumatlararo komissiya hamraisi, Fransiya tashqi savdo, iqtisodiy jozibadorlik masalalari va xorijdagi fransuz fuqarolarining ishlari boʻyicha vazir-delegati Olivye Besht boshchiligidagi delegatsiyani qabul qildi.

Mamlakatimizda Fransiyaning yetakchi kompaniya va tashkilotlari ishtirokidagi savdo-iqtisodiy, investitsiyaviy va moliyaviy hamkorlikning aniq loyihalarini ilgari surish va jadallashtirish masalalari koʻrib chiqildi.

Uchrashuv avvalida vazir Olivye Besht Fransiya Prezidenti Emmanuel Makronning samimiy salomi va shaxsiy maktubini yetkazdi.

Davlatimiz rahbari bugun kunning birinchi yarmida Toshkent shahrida oʻtgan Hukumatlararo komissiya yigʻilishi hamda “Medef” harakati ishbilarmonlar missiyasi joriy yil aprel oyida mamlakatimizga amalga oshirgan tashrifning samarali natijalarini katta mamnuniyat bilan qayd etdi.

“Yashil” iqtisodiyot, qazib chiqarish tarmogʻi, turizm infratuzilmasi va kommunal tarmoqlarni modernizatsiya qilish, boshqa ustuvor yoʻnalishlarda amalga oshirilayotgan strategik loyihalar izchil borayotgani qayd etildi.

Fransiya kompaniyalarida shaharsozlik, transport, toʻqimachilik sanoati, yangi turdagi qurilish materiallarini ishlab chiqarish boʻyicha loyihalarni amalga oshirishga qiziqishi ortib bormoqda.

Oʻzbekiston yetakchisi Oʻzbekiston-Fransiya savdo palatasini taʼsis etish va ishbilarmonlik tashabbuslarini qoʻllab-quvvatlashning samarali tizimini joriy etish borasidagi rejalarni qoʻllab-quvvatladi.