Oʻzbekiston — Germaniya: teng manfaatli hamkorlik yuqori pogʻonaga koʻtarilmoqda

18:33 07 Yanvar 2022 Siyosat
637 0

Mamlakatimizda soʻnggi yillarda Prezidentimiz Shavkat Mirziyoyev rahbarligida xorijiy va qoʻshni davlatlar bilan oʻzaro manfaatli va amaliy ruhdagi tashqi siyosat yuritish, doʻstona munosabatlarni rivojlantirishga alohida eʼtibor qaratilmoqda. Ushbu yoʻnalishda olib borilayotgan keng koʻlamli va izchil islohotlar natijasida nafaqat Markaziy Osiyo, balki iqtisodiy jihatdan yetakchi davlatlar bilan ham teng manfaatli hamkorlik yuqori pogʻonaga koʻtarilmoqda.

Yangi Oʻzbekistonning Yevropa davlatlariga yangi eshiklari ochildi. Mazkur mintaqa bilan butunlay oʻzgacha, konstruktiv munosabatlar boshlandi. Parlamentlararo aloqalar ham mustahkamlanib bormoqda.

Oliy Majlis Qonunchilik palatasi Spikerining birinchi oʻrinbosari Akmal Saidov Germaniya Federativ Respublikasining Oʻzbekistondagi Favqulodda va muxtor elchisi Tilo Klinner bilan uchrashdi.

Muloqot avvalida A. Saidov T.Klinnerni mamlakatimizga elchi etib tayinlangani bilan qutlab, masʼuliyatli va sharafli diplomatik missiyani amalga oshirishida muvaffaqiyat tiladi.

Mehmonga yurtimizda keyingi yillarda barcha sohada amalga oshirilayotgan keng koʻlamli islohotlar xususida batafsil maʼlumot berildi. Shuningdek, Oliy Majlisning qonunchilik faoliyati, norma ijodkorligi, fraksiyalar, qoʻmitalar va komissiyalar ish uslublari hamda parlamentarizm sohasidagi yangiliklar haqida axborotlar taqdim etildi.

Uchrashuvda ikki mamlakat parlamentlari oʻrtasida hamkorlikni rivojlantirish, parlamentlar qoshidagi ilmiy-tadqiqot institutlari oʻrtasida aloqalar oʻrnatish masalalari muhokama qilindi.

Oʻz navbatida, Tilo Klinner samimiy qabul uchun minnatdorlik bildirib, Oʻzbekiston — Germaniya aloqalari, xususan, parlamentlararo munosabatlarni yangi bosqichga olib chiqishda bor imkoniyatini ishga solishini aytib oʻtdi.

Muloqot yakunida Oʻzbekiston va Germaniya oʻrtasidagi hamkorlikni rivojlantirish, parlamentlararo aloqalarni yangi bosqichga olib chiqish boʻyicha aniq takliflar bildirildi.

“Xalq soʻzi”.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?

Ko‘p o‘qilganlar

Yangiliklar taqvimi

Кластер