Oʻzbekiston Respublikasi Prezidenti Shavkat Mirziyoyevning topshirigʻi bilan xalqimizning bagʻrikenglik va qoʻllab-quvvatlash ramzi sifatida “Qurbon hayiti” (Eid al-Adha) munosabati bilan Afgʻoniston aholisiga 183 tonna oziq-ovqat mahsuloti ortilgan navbatdagi insonparvarlik yordami yuklari Balx viloyatiga yetkazildi, deb xabar bermoqda Surxondaryo viloyati hokimligi axborot xizmati.

Xabarda aytilishicha, insonparvarlik yuklari Hayraton shahridagi “Astras” kompaniyasi hududida Oʻzbekiston Respublikasi Prezidentining Afgʻoniston boʻyicha maxsus vakili Ismatilla Irgashev, Surxondaryo viloyati hokimi Ulugʻbek Qosimov hamda Balx viloyati gubernatorining oʻrinbosari Nurulhodi Abuidris, shuningdek, ikki tomon rasmiylari ishtirokida topshirilgan.

Shuningdek, mazkur insonparvarlik yordami tarkibidan un, guruch, shakar, makaron va qandolat mahsulotlari, oʻsimlik yogʻi, tez tayyorlanadigan taomlar, qizil loviya va mosh oʻrin olgan.

“Afgʻoniston rasmiylari Oʻzbekiston Prezidenti va xalqiga koʻrsatayotgan insonparvarlik yordami uchun minnatdorchilik bildirib, Qurbon hayiti munosabati bilan samimiy tabriklarini yoʻllashdi”, — deyiladi hokimlik xabarida.