Toshkent irrigatsiya va qishloq xoʻjaligini mexanizatsiyalash muhandislari instituti ijtimoiy fanlar kafedrasi mudiri, tarix fanlari doktori, professor Shohistaxon Uljayeva “Yangi ovoz” Markaziy Osiyo yozuvchilari va tarixchilar ittifoqi Qirgʻiziston filialining «Turan Birimdigi» medali bilan taqdirlandi. Bu haqda kabar.kg sayti maʼlum qildi.

Uljayeva Amir Temur davri ilmiy merosini oʻrganishga, Markaziy Osiyo xalqlari oʻrtasidagi doʻstlikni mustahkamlashga, xususan, qirgʻiz va oʻzbek olimlari hamkorligini rivojlantirishga qoʻshgan ulkan hissasi va yutuqlari uchun taqdirlandi.

Bu haqda “Yangi Ovoz” Markaziy Osiyo yozuvchilari va tarixchilar uyushmasi direktorlar kengashi raisining oʻrinbosari, “Amir Temur” OBFning Qirgʻizistondagi bosh direktori Joldoshbek Monoldorov oʻzbekistonlik olimaga yozgan xatida eʼtirof etadi.

“Siz bugungi sinovli kunlarda Oʻzbekiston madaniyati va tarixi rivojiga juda katta hissa qoʻshmoqdasiz!” – deyiladi murojaatda.

Professor Uljayeva Amir Temur saltanati davrida ilmiy meros va arxiv materiallarini oʻrganish boʻyicha taniqli tarixchi-mutaxassislardan biri sanaladi.