Foto: SSV

Toshkent viloyatidagi bogʻchalarda zaharlangan hamda shifoxonalarga yotqizilgan bolalarning deyarli barchasi oilasi bagʻriga qaytgan. Sanitariya-epidemiologik osoyishtalik va jamoat salomatligi qoʻmitasi raisining birinchi oʻrinbosari Nurmat Otabekov maʼlum qilishicha, 30-sentyabr soat 14:00 holatiga koʻra uch nafar tarbiyalanuvchi shifokorlar nazorati ostida qolmoqda.

Taʼkidlanishicha, ular asosiy holatdan toʻliq sogʻaygan boʻlib, davolash jarayonida ularda oldindan mavjud kasalliklar aniqlangani sababli, qoʻshimcha tibbiy kuzatuv ostida qoldirilgan. Bolalarning ahvoli barqaror va yaqin kunlarda uylariga javob beriladi.

“Shunday qilib, tibbiy tadbirlar toʻliq yakunlandi. Shifoxonalar esa oʻzining odatiy ish faoliyatiga qaytdi. Eng muhimi, davlatimiz tomonidan oʻz vaqtida koʻrilgan chora-tadbirlar tufayli vaziyat barqaror ushlab turildi”, deydi Otabekov.

Qoʻshimcha qilinishicha, Sanitariya-epidemiologik osoyishtalik va jamoat salomatligi qoʻmitasi mamlakat boʻylab barcha taʼlim muassasalarida ovqatlanish xizmatlari ustidan nazorat va profilaktik tadbirlarni yanada kuchaytiradi.

“Mazkur ishlar kelgusida shunday holatlarning takrorlanishini oldini olishga qaratiladi. Shu oʻrinda yuksak masʼuliyat va fidoyilik bilan oʻz burchini ado etgan barcha tibbiyot xodimlariga samimiy minnatdorchilik bildiramiz”, deydi u.

Maktabgacha va maktab taʼlimi vazirligi yuqoridagi kabi holatlarning oldini olish uchun tizimli choralar koʻrilishini maʼlum qildi. Bu choralar nafaqat mavjud holatni bartaraf etishga, balki kelgusida bu kabi holatlarning takrorlanishini oldini olishga ham qaratilgan.

Qay etilishicha, vazirlik Prokuratura idoralari, Iqtisodiyot va moliya hamda Sogʻliqni saqlash vazirliklari bilan hamkorlikda barcha zarur choralarni amalga oshiradi.

“Amaldagi qonunchilikka muvofiq, ayrim bogʻchalarimizda umumiy ovqatlanish xizmatlari xususiy korxonalar tomonidan autsorsing tizimi orqali yoʻlga qoʻyilgan. Shartnomalarda sanitariya talablari va meʼyorlariga qatʼiy rioya qilish belgilangan.

Huquqni muhofaza qiluvchi idoralar va Sogʻliqni saqlash vazirligi bilan hamkorlikda voqea tafsilotlari har tomonlama oʻrganilmoqda. Kamchiliklar aniqlansa, tegishli shartnomalar qayta koʻrib chiqiladi yoki bekor qilinadi.

Vazirlik oʻz masʼuliyatini chuqur his qiladi va nazorat mexanizmlarini yanada kuchaytiradi”, deyilgan xabarda.

Shuningdek, MMTV bogʻchalarga ovqatlanish xizmati koʻrsatayotgan barcha tashkilotlarga murojaat qilib, sanitariya talablariga bepisandlik yoki oziq-ovqat sifati hisobiga xarajatlarni qisqartirishga mutlaqo yoʻl qoʻyilmasligini taʼkidlagan.

Bildirilishicha, joriy yilning 2-oktyabridan viloyatdagi barcha bogʻchalar oʻz faoliyatini odatiy ish rejimida davom ettira boshlaydi.