Oʻquvchilar oʻrtasida kibersport, dron va robototexnika, kelajak oʻyinlari boʻyicha alohida tanlovlar oʻtkaziladi. Bu toʻgʻrisida “Oʻquvchi-yoshlarni chaqiruvga qadar boshlangʻich tayyorlash tizimini yangi bosqichga olib chiqish chora-tadbirlari toʻgʻrisida”gi Prezident qarori (PQ-393-son, 15.11.2024) qabul qilindi.

Maʼlum qilinishicha, Qarorga koʻra, 2025/2026 oʻquv yilidan boshlab umumiy oʻrta (Prezident, ijod, ixtisoslashgan taʼlim muassasalari) taʼlim tashkilotlarida chaqiruvga qadar boshlangʻich tayyorgarlik fani nufuzini oshirish va uning rahbarlari faoliyatini muvofiqlashtirish yuzasidan yangi tizim joriy etiladi.

Yangi tizimga koʻra, “Vatan taqdiriga daxldorlik tuygʻusi, faol hayotiy pozitsiya” tamoyiliga asosan yangilangan CHQBT fanining oʻquv dasturi va darsliklari yaratiladi.

Bundan tashqari, taʼlim tashkilotlarida CHQBT fani haftasiga ikki soatdan oʻqitiladi. 2025-yil 1-iyundan taʼlim tashkilotlarida CHQBT rahbari lavozimi joriy etiladi.

Shuningdek, taʼlim tashkilotlarida oʻquvchilar oʻrtasida kibersport, dron va robototexnika, kelajak oʻyinlari boʻyicha alohida tanlovlar hamda harbiy-sport musobaqalari oʻtkaziladi.

Maʼlum qilinishicha, ziyolilar va nuroniylar ishtirokida “uch avlod uchrashuvlari” tashkil etilishi hamda harbiy xizmatchilar tomonidan motivatsion suhbatlar va mahorat darslari olib borilishi ham belgilandi.