Nurota tumanining Oqqula qishlogʻi azaldan kurashga ishtiyoqli, pushti poydor polvonlari bilan nom chiqargan. Ularning koʻpchiligi mahalliy sharoitda — uy toʻylari, davralar va turli marosimlarda bellashib, mahorat va chaqqonligini takomillashtirib kelgan. Boisi, qishloqda ham, yaqin atrofdagi hududlarda ham tuzukroq sport maydonchasi mavjud emas edi.

— “Tashabbusli byudjet” loyihasi tufayli qishlogʻimizda koʻp yillik muammolarga yechim topilmoqda, — deydi mehnat faxriysi Xolmirza Muhammadiyev. — Ilgari loyiha doirasida qishlogʻimizga ichimlik suvi tarmoqlari tortilib, soʻngra elektr taʼminotidagi uzilishlarga barham berish maqsadida transformator almashtirildi.

Yaqinda Oqquladagi 12-umumtaʼlim maktabi hududida sunʼiy qoplamali stadion foydalanishga topshirildi. Qishloq ahlini birlashtirgan ushbu loyiha yangi sport maydoniga aylanib, yoshlarni sogʻlom turmush va sportga jalb etishda muhim omilga aylanmoqda. Ochilish marosimida soʻz olganlar stadionning barpo etilishi Oqqulada infratuzilma yaxshilanishining navbatdagi bosqichi ekanini taʼkidlab, yosh sportchilar mazkur imkoniyatni munosib natijalar bilan oqlashlariga ishonch bildirishdi.

Temur ESHBOYEV, “Xalq soʻzi”.