Jahon sogʻliqni saqlash tashkilotining (JSST) rasmiy saytida Senatning Fan, taʼlim va sogʻliqni saqlash masalalari qoʻmitasi raisi oʻrinbosari, Parlamentlararo ittifoqning Salomatlik masalalari qoʻmitasi aʼzosi Oral Ataniyazovaning homilador ayollarni kafolatlangan sifatli dori vositalari bilan taʼminlash masalalariga bagʻishlangan intervyusi joylashtirildi.

Intervyuda taʼkidlanganidek, joriy yilning aprel oyida senator О. Ataniyazova JSST va Parlamentlararo ittifoqning qoʻshma yigʻilishida ishtirok etgan, unda xavfsiz onalik va samarali dori-darmonlar isteʼmol qilish imkoniyati bilan bogʻliq muammolar muhokama qilingan.

Uchrashuv yakunlari boʻyicha ekspertlar bir qator mamlakatlarda ona va bola salomatligini muhofaza qilish uchun qoʻllaniladigan dori vositalarining katta qismi belgilangan sifat standartlariga javob bermasligini va koʻpincha onalar oʻlimining asosiy sabablaridan biriga aylanayotganini taʼkidlagan. Ayniqsa, bu muammo daromadlar past va oʻrta boʻlgan davlatlarda oʻta dolzarb boʻlib, ularda tibbiyot xodimlari hayotiy muhim dori-darmonlarning samaradorligiga har doim ham ishonch hosil qila olmaydi.

Senator intervyuda Oʻzbekiston sogʻliqni saqlash tizimidagi islohotlarda erishilgan yutuqlarga urgʻu berib, ular tufayli mamlakatimizda onalar oʻlimi darajasi muntazam pasayib borayotganini taʼkidlab oʻtgan. Uning soʻzlariga koʻra, homiladorlik va tugʻruq tabiiy fiziologik jarayon boʻlib, tibbiy xizmat toʻgʻri tashkil etilsa, onalar oʻlimi xavfini minimallashtirish mumkin.

Bunda butun dunyoda parlament aʼzolari sifatli dori-darmonlar isteʼmol qilish imkoniyatini shunchaki texnik vazifadan sogʻliqni saqlashda tenglik va inson salohiyatiga strategik investitsiyalar masalasiga aylantirib, ushbu muammoni hal qilishda hal qiluvchi rol oʻynashga qodir ekanligi qayd etilgan.