Oʻzbekiston Respublikasi Oliy Majlisining Inson huquqlari boʻyicha vakilining (Ombudsmanning) Qashqadaryo viloyatidagi mintaqaviy vakili Murodulla Normuradovga Qarshi shahar 5-sonli tergov hibsxonasida saqlanayotgan mahbus S.H. sogʻligi yaxshi emasligi sababli shifoxonaga yotib davolanishni soʻrab murojaat qildi.

Uning yozishicha, avval yurak xuruji, infarkt kasalligini oʻtkazgan va tez-tez qon bosimi koʻtarilib ketadi. Mahbusning tibbiy holatidan kelib chiqib mintaqaviy vakilning tavsiyasi bilan u 23-son Mahkumlar uchun ixtisoslashgan kasalxonaga oʻtkazildi.

Shuningdek, Murodulla Normuradov Ombudsman tomonidan joyiga chiqib oʻrganish uchun yuborilgan Qashqadaryo viloyati Chiroqchi tumani “Humo” MFYda yashovchi fuqaro M.O.ning moddiy yordam soʻrab qilgan murojaatini koʻrib chiqdi.

Murojaat oʻrganilganda haqiqatdan ham ushbu oila nochor ahvolda yashashi va moddiy yordamga muhtojligi aniqlandi. Mintaqaviy vakilning tavsiyasi bilan Chiroqchi tuman hokimiyati tomonidan murojaatchi M.O.ga “Saxovat va koʻmak” jamgʻarmasi hisobidan 1 mln. soʻm moddiy yordam ajratildi.