Illyustrativ foto

“2028-yil Los-Anjeles shahrida (AQSH) boʻlib oʻtadigan XXXIV yozgi Olimpiya va XVIII Paralimpiya oʻyinlariga Oʻzbekiston sportchilarini kompleks tayyorlash toʻgʻrisida”gi Prezident qarori qabul qilindi. Bu haqda Adliya vazirligi xabar qildi.

Qayd etilishicha, sportning ustuvor toifadagi boks, dzyudo, taekvondo, erkin kurash, ogʻir atletika turlari boʻyicha medallar sonini oshirish va sportning rivojlanayotgan toifadagi triatlon, voleybol, stol tennisi, basketbol, zamonaviy besh kurash kabi 21 ta turi boʻyicha litsenziyalarni qoʻlga kiritish Oʻzbekiston sportchilarini Olimpiya va Paralimpiya oʻyinlariga tayyorlashning asosiy maqsadlari etib belgilandi.

Shuningdek, xalqaro sport tashkilotlari bilan hamkorlikni rivojlantirish ham koʻzda tutilgan.

Shu bilan bir qatorda, Olimpiya va Paralimpiya oʻyinlarida erishgan natijalardan kelib chiqib, sport turlari ustuvor, istiqbolli va rivojlanayotgan toifalarga ajratiladigan boʻldi.

Ustuvor, istiqbolli va rivojlanayotgan toifalardagi sport turlari roʻyxati har 4-yilda Olimpiya va Paralimpiya oʻyinlari oʻtkazilgan kalendar yilning yakuniga qadar qayta koʻrib chiqiladi va tasdiqlanadi.

Avvalroq Shavkat Mirziyoyev Olimpiya va Paralimpiya oʻyinlariga tayyorgarlik boʻyicha takliflar taqdimoti bilan tanishgani haqida xabar qilgandik.

Eslatib oʻtamiz, 2024-yilda Parijda oʻtgan Olimpiya va Paralimpiya oʻyinlarida yurtimiz sportchilari muvaffaqiyatli ishtirok etib, umumjamoa hisobida har ikki yoʻnalishda 13-oʻrinni egallagan edi.