Foto: Bosh prokuratura huzuridagi Departament

Shayxontohur tumanida noqonuniy tamaki mahsulotlari savdosi bilan shugʻullangan shaxs qoʻlga olindi. Bosh prokuratura huzuridagi Departamentning Shayxontohur tumani boʻlimi tomonidan oʻtkazilgan tezkor tadbirda fuqaro J.A. qonunga xilof ravishda tamaki mahsulotlari savdosi bilan shugʻullangani aniqlandi.

Tezkor tadbir davomida J.A. Beruniy koʻchasidagi umumiy ovqatlanish shoxobchasi oldida noqonuniy savdo rastasi tashkil etgani va xaridor M.X.ga “Parlament” nomli aksiz markasiz tamaki mahsulotini sotgan vaqtida qoʻlga olingani maʼlum boʻldi. Shuningdek, uning sotuv nuqtasidan 1 843 quti turli nomdagi tamaki mahsulotlari olib qoʻyildi. Ushbu mahsulotlarning umumiy bahosi 64,3 million soʻmni tashkil etgan.

Huquqni muhofaza qiluvchi organlar mazkur holat yuzasidan Jinoyat kodeksining 186-1-moddasi boʻyicha jinoyat ishi qoʻzgʻatgan. Mazkur modda eti spirti, alkogolli mahsulot va tamaki mahsulotlarini qonunga xilof ravishda muomalaga kiritish yoki ishlab chiqarish bilan bogʻliq huquqbuzarliklarni qamrab oladi.

Ayni vaqtda tergov harakatlari olib borilmoqda. Mutasaddilar bunday noqonuniy faoliyatlarga chek qoʻyish maqsadida nazorat tadbirlarini davom ettirishmoqda. Huquqni muhofaza qiluvchi organlar fuqarolarni qonun talablariga amal qilishga va noqonuniy mahsulotlar savdosidan voz kechishga chaqirmoqda.