Isroil bosh vaziri Binyamin Netanyahu Falastin davlati Iordan daryosining gʻarbida hech qachon tuzilmasligini maʼlum qildi. Uning bayonotini bosh vazir matbuot xizmati tarqatdi.

— Falastin davlati boʻlmaydi. Bizning yuragimizda terrorchi davlat barpo etishning soʻnggi urinishiga javobni AQSHdan qaytgach beraman, — dedi Netanyahu.

Isroil bosh vaziri, shuningdek, Falastinni tan olgan mamlakatlar rahbarlariga murojaat qildi.

— 7-oktyabrdagi dahshatli qirgʻindan keyin Falastin davlatini tan olgan yetakchilarga aniq xabarim bor: siz terrorizmga ulkan mukofot bermoqdasiz. Men yillar davomida bu terrorchi tuzilmaning barpo etilishiga yoʻl qoʻymaslik uchun ichki va tashqi ulkan bosimlarga qarshi turdim. Biz qatʼiy va oqilona yoʻl tutdik. Bundan tashqari, Yahudeya va Samariyada yahudiylar qurilishini ikki baravar oshirdik va bu yoʻldan borishda davom etamiz. Davlatimiz markazida terror davlatini oʻrnatish urinishiga javobni men AQSHdan qaytgach beraman. Kuting, — dedi u.

Eslatib oʻtamiz, avvalroq Buyuk Britaniya, Avstraliya, Kanada va Portugaliya Falastin davlatini tan olganini eʼlon qilgan edi.