Buxoro viloyatidagi Romitan innovatsion hududida “Revmo Gloves” masʼuliyati cheklangan jamiyati tomonidan “Artrit bilan kasallangan bemorlarni ultratovush orqali davolash uchun neylon matoli qoʻlqop ishlab chiqarish” loyihasi amalga oshirildi. U Innovatsion rivojlanish agentligi tomonidan moliyalashtirildi.

Shifokorlar boʻgʻimlarning yalligʻlanishi bilan kechadigan holatni umumiy nom bilan artrit deb atashadi. Bu xastalik odatda, boʻgʻimlardagi harakatni chegaralab qoʻyadi.Ogʻriq ham beradi. Korxona mahsulotiga kelsak, uning vositasida artrit bilan kasallangan bemorlarni ultratovush orqali davolash mumkin. Mutaxassislarning taʼkidlashlaricha, qoʻlqop uchun tanlangan neylon matosi havo oʻtkazuvchi, issiqlikni saqlovchi elastik xususiyatga ega. U bemorda qon aylanishini yaxshilaydi. Qizarish, shish, ogʻriq kabi patologik jarayonlarni davolashda asqatadi.Bunday noxush hollarning oldini olishda ham qoʻl keladi.Korxonada yiliga 50 ming juft shunday qoʻlqop tayyorlash quvvati yaratilgan. Ayni paytda “Revmo Gloves” mahsuloti dorixonalar orqali sotilmoqda.Tez orada uni shifoxonalarga ham yetkazish yoʻlga qoʻyiladi.

Loyiha Oʻzbekiston Respublikasi Prezidentining “2022-2026-yillarda Oʻzbekiston Respublikasining innovatsion rivojlanish strategiyasini amalga oshirish boʻyicha tashkiliy chora-tadbirlar toʻgʻrisida”gi qaroriga asosan hayotga tadbiq etildi.

Istam IBROHIMOV, “Xalq soʻzi”.