Navroʻz va Ramazon hayiti bayramlari munosabati bilan Toshkent – Buxoro – Toshkent yoʻnalishida qoʻshimcha “Afrosiyob” elektropoezdi qatnovi yoʻlga qoʻyiladi. Bu haqda “Temiryoʻl Ekspress” kompaniyasi matbuot xizmati xabar berdi.

Qoʻshimcha qatnovlar 20, 25, 31-mart hamda 1-aprel kunlari amalga oshiriladi. “Ushbu qatnovlar yoʻlovchilar oqimini tartibga solish va bayram kunlari yoʻlovchilarga qoʻshimcha qulayliklar yaratish maqsadida yoʻlga qoʻyilmoqda”, deyiladi xabarda.

Yangi rejalashtirilgan jadvalga koʻra, 778-sonli Toshkent – Buxoro yoʻnalishidagi poezd Toshkentdan soat 06:03 da joʻnab ketib, 10:14 da Buxoroga yetib boradi. 777-sonli Buxoro – Toshkent yoʻnalishidagi poezd esa soat 17:55 da harakatlanib, 22:08 da poytaxtga yetib keladi.

Bundan avval, bayramlar munosabati bilan Toshkent – Samarqand yoʻnalishida ham qoʻshimcha “Afrosiyob” poezdi qatnovi yoʻlga qoʻyilishi eʼlon qilingan edi. Oʻzbekiston temir yoʻllari bayram kunlarida yoʻlovchilarning transport ehtiyojlarini toʻliq qondirish uchun bunday reyslarni koʻpaytirishi koʻzda tutilgan.

Qoʻshimcha poezd qatnovlarining joriy etilishi sayohatchilar va yoʻlovchilar uchun qulay transport tizimini taʼminlab, bayram kunlarida yoʻlovchilar oqimini kamaytirishga xizmat qilishi kutilmoqda.