Bosh prokuratura huzuridagi Departamentning Navoiy viloyati Konimex tumani boʻlim xodimlari tomonidan tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, kuchli taʼsir qiluvchi dori vositalari savdosi bilan shugʻullanib kelgan fuqaro F.D. fuqaro Sh.X.ga 5 turdagi xorijda ishlab chiqarilgan jami 1 ming 200 dona tarkibida kuchli taʼsir qiluvchi moddalari mavjud boʻlgan vositalarni 6,9 million soʻmga sotgan vaqtida qoʻlga olingan.

Shundan soʻng, tezkor tadbir davom ettirilib, uning Toshkent shahri, Shayxontohur tumanidagi xonadonidan 16 quti 480 dona kuchli taʼsir qiluvchi dori vositalari ashyoviy dalil sifatida rasmiylashtirib olingan.

Hozirda mazkur holat yuzasidan Jinoyat kodeksining 251-1-qismi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishi qoʻzgʻatilib, tergov harakatlari oʻtkazilmoqda.