Navoiy viloyatida xalqaro mehnat yarmarkasi hamda xorijda ishlash niyatida boʻlgan fuqarolar uchun mehnat forumi tashkil etildi.

Tadbir Navoiy viloyati hokimligi, Oʻzbekiston Respublikasi Vazirlar Mahkamasi huzuridagi Migratsiya agentligi hamda Xususiy bandlik agentliklari federatsiyasi oʻrtasidagi oʻzaro hamkorlik doirasida tashkil etildi.

Ushbu hamkorlik viloyatda mehnat migratsiyasini tartibga solish, fuqarolarimiz uchun qonuniy, xavfsiz va munosib mehnat sharoitlarini yaratishga qaratilgan.

— Yarmarkada har bir agentlik tomonidan taqdim etilgan ish oʻrinlari boʻyicha ishtirokchilarga batafsil tushunchalar berildi, — deydi Migratsiya agentligining Navoiy hududiy filiali rahbari Ismat Boltayev. — Yaʼni, tomonlarning huquq va majburiyatlari, yaratilgan shart-sharoit hamda mehnat muhofazasi bilan tanishtirildi. Albatta, malakali mutaxassislar ustuvorlikka ega boʻlishmoqda. Maʼlumot oʻrnida taʼkidlash joiz, ayni paytda viloyatimizda xorijiy davlatlar bilan hamkorlikda 7 ta yirik xalqaro loyiha muvaffaqiyatli amalga oshirilmoqda. Ushbu loyihalarda ishtirok etayotgan fuqarolar uchun oʻrtacha oylik maosh 1500–2000 AQSH dollarini tashkil etmoqda.

Yarmarkada Worldbridge, Visa Master, Bestwill, Getwork, Workmall, International Migration Line, Jobbridge, Mirpower, Interwork, The Best Staff kabi yetakchi xususiy bandlik agentliklari ishtirok etishib, mazkur agentliklar tomonidan viloyatning Xatirchi tumanida ham xuddi shunday forum tashkil etildi.

Temur ESHBOYEV, “Xalq soʻzi”.