Raqobat qoʻmitasining Navoiy viloyati hududiy boshqarmasi tomonidan oʻtkazilgan tekshiruv natijasida “Elkimyo-suvtaʼminot” MCHJ tomonidan isteʼmolchilardan ichimlik suvi va kanalizatsiya xizmatlari uchun noqonuniy ravishda 200 million soʻmdan ortiq mablagʻ undirilgani aniqlangan.

Tartibga koʻra, tabiiy monopoliya subyektlari oʻz xizmatlariga belgilangan tariflarning oʻzgarishi haqida kamida 15 kun oldin ommaviy axborot vositalari va rasmiy veb-saytlari orqali aholiga maʼlum qilishi lozim. Biroq, mazkur korxona bunga rioya qilmagan.

Aniqlangan qonunbuzarliklar asosida Raqobat qoʻmitasi hududiy boshqarmasining Maxsus komissiyasi tomonidan “Elkimyo-suvtaʼminot” MCHJga nisbatan ish qoʻzgʻatilib, unga nisbatan moliyaviy jarima qoʻllash boʻyicha qaror qabul qilindi.

Bundan tashqari, isteʼmolchilardan ortiqcha undirilgan 200 million soʻm qayta hisob-kitob qilinishi boʻyicha koʻrsatma berilgan.