Oʻzbekistondagi taniqli futbol mutaxassislaridan biri Sergey Ivanovich Lushan Namanganning “Navbahor” futbol klubi bosh murabbiyi sifatida ish boshladi. Bu haqda OʻzA xabar berdi.

Yangi murabbiy viloyat hokimi, viloyat futbol assotsiatsiyasi raisi Shavkat Abdurazzoqov ishtirokida boʻlib oʻtgan yigʻilishda klub aʼzolariga rasman tanishtirildi.

Maʼlumot oʻrnida, Sergey Lushan 1973-yil 14-iyunda Toshkent shahrida tugʻilgan. U faoliyati davomida yurtimizning “Maʼdanchi” (Bekobod) va “Bunyodkor” (Toshkent), shuningdek, Rossiyaning bir qator jamoalarida toʻp surgan.

Lushan murabbiylik faoliyati davomida 2014-2023-yillarda Oʻzbekiston (“U-19”) oʻsmirlar terma jamoasi, “Bunyodkor” (Toshkent), “Soʻgʻdiyona” (Jizzax), “Dinamo” (Samarqand), Belarusning “Shaxtiyor” (Soligorsk), “Shaxtiyor” (Petrikov) jamoalarida ishlagan. U soʻnggi paytlarda, Odil Ahmedov futbol akademiyasi direktori sifatida faoliyat yuritib kelayotgan edi.

Eslatib oʻtamiz, “Navbahor”ni 2021-yildan buyon boshqarib borayotgan Samvel Babayan Oʻzbekiston Superligasining 2024-yilgi mavsumi birinchi davrasidagi qator muvaffaqiyatsiz natijalardan soʻng oʻz lavozimini tark etgandi.