Namangan viloyati maktabgacha va maktab taʼlimi tizimiga qarashli muassasalarning 25 nafar xodimi Malayziyaning Subang Jaya shahrida oʻtkazilayotgan oʻquv-tajriba dasturida ishtirok etmoqda. Dastur Unimas universiteti hamda uning qoshidagi Kuala Lumpur Learning Centre bazasida tashkil etilgan.

Taʼlim safari doirasida ishtirokchilar uchun STEM taʼlimiga ixtisoslashgan yoʻnalishlar boʻyicha mahorat darslari, amaliy mashgʻulotlar, universitet professor-oʻqituvchilari bilan tajriba almashuv jarayonlari, shuningdek, qator taʼlim maskanlariga tashriflar rejalashtirilgan.

Xizmat safari jarayonida Namangan viloyati maktabgacha va maktab taʼlimi boshqarmasi boshligʻi oʻrinbosari Xayrullo Abdurahmonov hamda markaz direktori doktor Vong Sey No oʻrtasida uchrashuv oʻtkazilib, kelgusidagi hamkorlik, qoʻshma loyihalar va sohadagi tajriba almashuv yoʻnalishlari muhokama qilindi.

— Tajriba almashuvning dastlabki bosqichida Savarak va Malayziya Milliy universitetlari hamda Sunway xalqaro maktabi faoliyati bilan tanishdik, ushbu muassasalardagi mashgʻulotlarda qatnashdik, — deydi Toʻraqoʻrgʻon tumanidagi 58-umumtaʼlim maktabi direktori Boburjon Haqberdiyev. — Xorijiy mutaxassislar oʻtgan mahorat darslari pedagogik texnologiyaning koʻplab amaliy jihatlarini yanada chuqur oʻzlashtirishimizga yordam berdi.

Maʼlumot uchun, 15-dekabrga qadar davom etuvchi ushbu oʻquv amaliyotining asosiy maqsadi Namangan viloyatida STEM yoʻnalishini rivojlantirish, pedagoglarni zamonaviy ilmiy-amaliy yondashuvlar bilan tanishtirish hamda xalqaro tajribani mahalliy taʼlim jarayoniga bosqichma-bosqich tatbiq etishdan iborat.

Qudratilla NAJMIDDINOV, “Xalq soʻzi”.