Inson xotirasi bilan aziz. Namanganliklar mustaqillikning dastlabki yillarida viloyatga rahbarlik qilgan Burgutali Rapigʻaliyev nomini yaxshi eslashadi. Hudud ijtimoiy-iqtisodiy rivojida oʻziga xos iz qoldirgan fidoyilar qatorida   Dilshoda  Dadajonova, Sayfidddin Toshpoʻlatov, Boʻri Allamurodov, Abdullajon Hasanov, Nosir Otaxonov, Madamin Obidshoyevlar ismi sharifi ham alohida ehtirom bilan tilga olinadi. Viloyat mahalla va oilani qoʻllab-quvvatlash boshqarmasi hamda “Keksalarni eʼzozlash” jamoat fondi ana shunday aziz insonlar yodi uchun sportning shaxmat, stol tennisi, minifutbol va belbogʻli kurash turlari  boʻyicha xotira turniri oʻtkazdi. Unda  hamon gʻayrati joʻshib turgan 153 nafar nuroniy maydonga tushdi.

Dastlabki kungi shaxmat va stol tennisi bahslarida Namangan shahri va Yangiqoʻrgʻon tuman jamoalari gʻalaba qilgan boʻlsa, minifutbolda ham viloyat markazi vakillarining qoʻli baland keldi. Aytish lozimki, belbogʻi kurash  turnirning eng qiziqarli bellashuvi sifatida koʻpchilikda yorqin taassurot qoldirdi.Unda oʻz davrida mahorat bilan bel olishib, kuragi yerga tegmagan 48 nafar polvon otaxon gilamga tushib, sportning ushbu  turi sir-asrorlarini hamon unutmaganliklarini namoyish etdilar. Ayniqsa, toʻraqoʻrgʻonlik keksa kurashchilar - Alijon Latipov va Neʼmatilla  Toʻychiyev, yangiqoʻrgʻonlik Baxtiyor Yusubbekov, poplik Solijon Umarovning barcha raqiblari ustidan gʻalabasi tomoshabinlarning davomli qarsaklari  bilan olqishlandi.

Xotira turnirining yakunlovchi qismiga  yodga olingan tabarruk insonlarning  farzandlari, shuningdek, keng jamoatchilik vakillari taklif etildi. Tadbirda ishtirok etgan viloyat hokimi Sh. Abdurazzoqov  oʻz davrida Namangan taraqqiyotining ustuni boʻlgan yurtdoshlarning fidokorona mehnatini yana bir  karra tilga oldi. Turnir gʻoliblariga tashkilotchilarning qimmatbaho sovgʻalari tantanali surʼatda topshirildi.

Qudratilla NAJMIDDINOV,

“Xalq soʻzi”