Namanganda soʻnggi besh yilda 39 ming gektar yer qayta foydalanishga kiritildi. Bu haqda Shavkat Mirziyoyev raisligida Namanganda boʻlib oʻtayotgan yigʻilishda maʼlum qilindi.

Prezident Toʻraqoʻrgʻonda tomchilab sugʻorish orqali 5 ming gektar adir yerlarni oʻzlashtirish ishlari boshlanganini maʼqulladi. Hozirgacha 2 ming gektar oʻzlashtirildi, shundan 1,3 ming gektarida bogʻ va uzumzor tashkil etildi, 4 ming kishi ishli boʻldi.

Bu ishlarni davom ettirib, Pop tumanida 4 ming gektar, Kosonsoy, Chust va Mingbuloq tumanlarida 1 ming gektardan yerni qayta foydalanishga kiritish vazifasi qoʻyildi.

Norin tumanida joylashgan baliqchilik klasteridagi ishlar yuqori baholandi. Oʻsha yerning oʻzida mahalliy aholi forel baligʻi yetishtirishga oʻrgatilmoqda.

Xoʻja-qoʻrgʻoncha mahallasidagi 25 ta xonadon klaster bilan kooperatsiya qilib, yiliga har biri 150 million soʻmgacha daromad koʻrmoqda.

Bu tizimni ommalashtirib, Uchqoʻrgʻon va Norin tumanidagi 1 ming xonadonda forel yetishtirishni yoʻlga qoʻyish, 1 sotixli 350 ta sunʼiy hovuz oʻrnatib, aholiga boʻlib berish muhimligi taʼkidlandi.

Niderlandiyalik hamkorlar bilan yiliga 20 ming tonna baliq ozuqasi ishlab chiqarish yoʻlga qoʻyiladi.