Qudratilla NAJMIDDINOV/“Xalq soʻzi”. Bu ish Majburiy ijro byurosi Namangan shahar boʻlimi tomonidan oʻtkazilgan navbatdagi ijro harakatlari davomida amalga oshirildi. Maʼlum boʻlishicha, Departamentning viloyat boshqarmasi tomonidan oʻtkazilgan tezkor tadbir chogʻida ikkita holatda noqonuniy dori vositalari savdosi bilan shugʻullanib kelgan fuqarolar faoliyatiga chek qoʻyilgan. Jumladan, viloyat markazida yashovchi D.B. va bir guruh shaxslar ayni yumush bilan shugʻullanib kelishgan.

Yana ikki holatda viloyat bojxona va ichki ishlar boshqarmalari tomonidan aylanmay yoʻllar orqali bir guruh shaxslar tomonidan dori vositalari va tibbiyot buyumlarini olib kirishga urinish fosh etilgan.

— Mazkur holatlar yuzasidan Jinoyat kodeksining 186-3-moddasi (sifatsiz yoki qalbakilashtirilgan dori vositalarini yoxud tibbiy buyumlarni oʻtkazish maqsadida ishlab chiqarish, tayyorlash, olish, saqlash, tashish yoki oʻtkazish, dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish) bilan jazo muqarrarligi taʼminlanib, sudning qaroriga asosan huquqbuzarlardan olingan ashyoviy dalillarni yoʻq qilish belgilangan, — deydi MIB viloyat boshqarmasi masʼul xodimi Sohibjon Rapiqov.

Kuni kecha oʻtkazilgan navbatdagi tadbirda tegishli idoralar masʼullari ishtirokida 839 turdagi 1 milliard 150 million soʻmlik dori vositalari va tibbiyot buyumlari yoqish, toʻkib tashlash va sindirish yoʻli bilan yoʻq qilindi.