Foto: Illustrativ foto

Voqea kecha Uchqoʻrgʻon tumanida roʻy berdi. Ichimlik suvidan 3 million soʻmga yaqin qarzdor boʻlgan “Baxtli avlod” xususiy maktabgacha taʼlim tashkilotida ushbu mablagʻni toʻlashni talab qilib kelgan suv taʼminoti korxonasi xodimlarini kutilmagan “syurpriz” bilan qarshi olishdi. Xizmat vazifasini bajarayotgan ikki nafar suvsoz he yoʻq, be yoʻq MTT egalari va ularga qarashli odamlar tomonidan koʻpchilik boʻlib kaltakka tutildi.

— Doʻpposlangan nazoratchilarimiz bosh, boʻyin va qorin qismlarida ogʻriq bilan tuman tibbiyot birlashmasi tez yordam boʻlimiga olib kelingan, —deydi “Namangan suv taʼminoti” MCHJ masʼul xodimi Toirbek Komiljonov. —Hozirda xodimlarning salomatligi shifokorlar nazoratida.

Ish beruvchi tashkilot oʻz xodimlariga koʻrsatilgan gʻayriqonuniy harakatlar boʻyicha baho berishni soʻrab huquq idoralariga murojaat qildi. Aybdorlar jazosini olishi tabiiy. Biroq shu oʻrinda haqli savol tugʻiladi? Nahotki, bolalar tarbiyasi bilan shugʻullanishdek masʼuliyatli yumush shunday zoʻravonlarga qolgan boʻlsa.

                                                                  Qudratilla NAJMIDDINOV, “Xalq soʻzi”.