Qudratilla Najmiddinov/“Xalq soʻzi”. Shu kunlarda Namangan viloyati yirik sport anjumani — erkin va yunon-rum kurash boʻyicha kattalar oʻrtasida I “Oʻzbek botirlari” xalqaro gran-pri turniriga mezbonlik qilmoqda.

Yangi Namangan tumanidagi “Pahlavon” sport majmuasida oʻtkazilayotgan musobaqaning birinchi kunida oʻzbekistonlik polvonlardan tashqari Qirgʻiz Respublikasi, Qozogʻiston, Tojikiston, Rossiyadan kelgan 140 nafar yunon-rum kurashi ustasi olti vazn toifasida bahslarga kirishdi. Murosasiz bellashuvlar yakunida barcha vazn toifasida birinchi oʻrinni hamyurtlarimiz qoʻlga kiritdi. Shuningdek, Qozogʻiston va Qirgʻiz Respublikasi vakillari ham sovrinli oʻrinlarga ega chiqdi.

— Xalqaro turnir bir qator yangi nomlarni kashf etmoqda, — deydi 67 kg vazn toifasida bahslarda qatnashgan namanganlik Shermuhammad Sharibjonov. — Bunday bellashuvlarda epchillik va mahorat oʻz soʻzini aytadi. Gʻoliblikka erishib, ustozlarim, ota-onam va hamshaharlarim ishonchini oqlaganimdan xursandman.

Yakunda gʻoliblikka erishgan polvonlarga oltin medallar va 15 million soʻmdan pul mukofotlari topshirildi. Oʻz vaznida ikkinchi boʻlgan sportchilar kumush medal va 8 million, uchinchi oʻrin sohiblari esa bronza medal hamda 5 million soʻm pul mukofotiga ega boʻldi.

Bugun erkin kurash boʻyicha bahslar boʻlib oʻtmoqda.