2020-yilning 13-noyabr kuni oʻzbek milliy kiyinish madaniyati targʻibotini tashkil etishga qaratilgan “Nafosat” festivalining ishchi guruhi yigʻilishi boʻlib oʻtdi.

Unda Oʻzbekiston Respublikasi Oliy Majlisi Senati aʼzolari, Gender tenglikni taʼminlash masalalari boʻyicha komissiya, vazirlik va idoralar, ommaviy axborot vositalari vakillari ishtirok etdilar.

Taʼkidlanganidek, kiyinish madaniyati inson maʼnaviyatining oʻziga xos koʻzgusi boʻlib, koʻp jihatdan shaxsning feʼl atvori, dunyoqarashi va qadriyatlaridan dalolat beradi. Shu jihatdan xalqimizga xos uslub barcha zamonlarda ham millatimizga xos orastalik, kamtarlik va goʻzallikka intilish kabi fazilatlarni namoyon etib kelgan.

Bugungi kunda ushbu xususiyatlar ayniqsa katta dolzarblik kasb etayotgani tadbir ishtirokchilari tomonidan alohida qayd etildi. Joriy yilning 20-noyabridan 20-dekabrigacha oʻtkaziladigan “Nafosat” festivali ham avvalo milliy qadriyatlarimizni va ayollar liboslaridagi zamonaviy moda yoʻnalishlarini birlashtirib, vijdon va eʼtiqod erkinligini hisobga olgan holda oʻzbek milliy modasini shakllantirish maqsadida tashkil etilmoqda.

Festivalning dastlabki bosqichi Buxoro shahrida oʻtkaziladi. Unda Buxoro, Navoiy, Qashqadaryo, Surxondaryo, Jizzax, Samarqand viloyatlaridan soha mutaxassislari va keng jamoatchilik vakillari ishtirok etadi. Keyingi bosqichlar mintaqaviy tarzda Fargʻona, Xorazm viloyatlarida, yakuniy qismi esa Toshkent shahrida oʻtkaziladi.

Festival doirasida davra suhbatlari, koʻrik-tanlovlar va boshqa ommaviy tadbirlar tashkil etiladi.

Shuningdek, yoshlar oʻrtasida qadriyat va qarashlarimizga begona boʻlgan “ommaviy madaniyat”ning salbiy oqibatlariga qarshi qaratilgan targʻibot-tashviqot ishlarini tashkil etish ham koʻzda tutilgan.

Bundan tashqari, oʻzbek milliy kiyinish madaniyatiga bagʻishlangan badiiy ham ilmiy nashrlar tayyorlash, aholi, ayniqsa yoshlarning milliy kiyinish madaniyatiga munosabati hamda qiziqishlarini oʻrganish maqsadida ijtimoiy soʻrov oʻtkazish ham rejalashtirilmoqda.