2020 йилнинг 13 ноябрь куни ўзбек миллий кийиниш маданияти тарғиботини ташкил этишга қаратилган «Нафосат» фестивалининг ишчи гуруҳи йиғилиши бўлиб ўтди.

Унда Ўзбекистон Республикаси Олий Мажлиси Сенати аъзолари, Гендер тенгликни таъминлаш масалалари бўйича комиссия, вазирлик ва идоралар, оммавий ахборот воситалари вакиллари иштирок этдилар.

Таъкидланганидек, кийиниш маданияти инсон маънавиятининг ўзига хос кўзгуси бўлиб, кўп жиҳатдан шахснинг феъл атвори, дунёқараши ва қадриятларидан далолат беради. Шу жиҳатдан халқимизга хос услуб барча замонларда ҳам миллатимизга хос орасталик, камтарлик ва гўзалликка интилиш каби фазилатларни намоён этиб келган.

Бугунги кунда ушбу хусусиятлар айниқса катта долзарблик касб этаётгани тадбир иштирокчилари томонидан алоҳида қайд этилди. Жорий йилнинг 20 ноябридан 20 декабригача ўтказиладиган «Нафосат» фестивали ҳам аввало миллий қадриятларимизни ва аёллар либосларидаги замонавий мода йўналишларини бирлаштириб, виждон ва эътиқод эркинлигини ҳисобга олган ҳолда ўзбек миллий модасини шакллантириш мақсадида ташкил этилмоқда.

Фестивалнинг дастлабки босқичи Бухоро шаҳрида ўтказилади. Унда Бухоро, Навоий, Қашқадарё, Сурхондарё, Жиззах, Самарқанд вилоятларидан соҳа мутахассислари ва кенг жамоатчилик вакиллари иштирок этади. Кейинги босқичлар минтақавий тарзда Фарғона, Хоразм вилоятларида, якуний қисми эса Тошкент шаҳрида ўтказилади.

Фестиваль доирасида давра суҳбатлари, кўрик-танловлар ва бошқа оммавий тадбирлар ташкил этилади.

Шунингдек, ёшлар ўртасида қадрият ва қарашларимизга бегона бўлган «оммавий маданият»нинг салбий оқибатларига қарши қаратилган тарғибот-ташвиқот ишларини ташкил этиш ҳам кўзда тутилган.

Бундан ташқари, ўзбек миллий кийиниш маданиятига бағишланган бадиий ҳам илмий нашрлар тайёрлаш, аҳоли, айниқса ёшларнинг миллий кийиниш маданиятига муносабати ҳамда қизиқишларини ўрганиш мақсадида ижтимоий сўров ўтказиш ҳам режалаштирилмоқда.