Intellektual mulk agentligiga “Sh.M.M” masʼuliyati cheklangan jamiyati tomonidan Sevimli telekanalida “Nomus kuchi” nomli badiiy filmdan muallifning roziligisiz hamda tegishli shartnoma rasmiylashtirilmagan holda foydalanganlik holati boʻyicha qonuniy chora koʻrish toʻgʻrisidagi murojaati kelib tushgan. Bu haqda agentlik maʼlum qildi.

"Ushbu murojaat Agentlik tomonidan oʻrganib chiqilib, aniqlangan huquqbuzarlik holati boʻyicha Jinoyat sudiga bayonnoma kiritildi. Shundan soʻng Maʼmuriy javobgarlikka tortish va yetkazilgan moddiy zararni undirish boʻyicha masalalar sud tomonidan hal etiladi.

Maʼlumot uchun, 2020-yil 1-iyulda “Nomus kuchi” nomli badiiy filmining muallifi badiiy filmdan foydalanish boʻyicha mutlaq mulkiy huquqni “Sh.M.M” masʼuliyati cheklangan jamiyatiga oʻtkazib bergan. Darhaqiqat, Oʻzbekiston Respublikasi “Mualliflik huquqi va turdosh huquqlar toʻgʻrisida”gi Qonunining 6-moddasiga koʻra audiovizual asarlar mualliflik huquqi obyektlaridan biri hisoblanadi.

Vaholangki, “Nomus kuchi” badiiy filmi 2020-yil 13-noyabrda efirga uzatilgan boʻlib, ushbu davrda huquq egasi bilan audiovizual asardan foydalanish boʻyicha rozilik olinmagan va hech qanday shartnoma rasmiylashtirilmagan.

Shu oʻrinda, agar sizning oʻz ijod namunangizga oid kino asarlar, koʻrsatuvlar sizning ruxsatingizsiz hech qanday shartnoma rasmiylashtirilmagan yoki asaringiz butunligi buzilgan (ayrim qismlari olib tashlangan) holda telekanallar orqali ommaga namoyish etilgan taqdirda Intellektual mulk agentligiga murojaat qilishingizni va huquqlaringizni oʻz vaqtida tiklashingizni eslatib oʻtamiz", deyiladi agentlik xabarida.