10-maydan 17-mayga qadar Polshaning Varshava shahrida Jahon kubogining ikkinchi bosqichi boʻlib oʻtadi. Musobaqa “World Boxing” tashkiloti tomonidan oʻtkaziladi va unda Oʻzbekiston terma jamoasi ham ishtirok etadi. Vakillarimiz musobaqada kuchli tarkib bilan qatnashadi.

Ushbu xalqaro boks turniri jahon miqyosidagi eng nufuzli musobaqalardan biri hisoblanadi. Unda dunyoning yetakchi bokschilari oʻzaro bahs olib boradi. Oʻzbekistonlik bokschilar mazkur musobaqada yuqori natijalarni koʻzlab yoʻlga chiqishdi.

Erkaklar oʻrtasida quyidagi sportchilar ringga koʻtariladi: 55 kg vazn toifasida Mirazizbek Mirzahalilov, 60 kgda Samandar Olimov, 65 kgda Asadxoʻja Moʻydinxoʻjayev, 70 kgda Gʻofur Tohirov, 75 kgda Fazliddin Erkinboyev, 80 kgda Javohir Ummataliyev, 85 kgda Akmaljon Isroilov va +92 kgda Jahongir Zokirov.

Ayollar orasida esa 57 kg vazn toifasida Xumorabonu Mamajonova Oʻzbekiston sharafini himoya qiladi.

Bokschilarimizning ushbu bosqichdagi ishtiroki milliy terma jamoamizning xalqaro maydondagi salohiyati va tayyorgarlik darajasini yana bir bor sinovdan oʻtkazadi. Terma jamoamizga musobaqada omad tilaymiz.