Qozogʻiston Respublikasining Oʻzbekiston Respublikasidagi Elchixonasida shu mavzuda “davra suhbati” boʻlib oʻtdi. Unda Oʻzbekiston Respublikasi Oliy Majlisining Senati aʼzolari va Qonunchilik palatasi deputatlari, Oʻzbekistonning yetakchi ekspertlari, tahlilchilari va OAV vakillari Qozogʻiston Prezidenti Q.Toqayevning Qozogʻiston xalqiga yoʻllagan “Sunʼiy intellekt davrida Qozogʻiston: dolzarb vazifalar va ularni raqamli transformatsiya orqali hal qilish” nomli Murojaatini muhokama qildilar. Qozogʻistonning Oʻzbekistondagi Elchisi Beybit ATAMQULOV davra suhbatida Prezident Qosim-Jomart Toqayevning “Sunʼiy intellekt davrida Qozogʻiston” Murojaatidagi asosiy gʻoyalarni taqdim etdi. U raqamlashtirishning strategik ahamiyatini, Sunʼiy intellekt vazirligi tashkil etilishini va yangi texnologiyalar – jumladan, raqamli tenge hamda superkompyuterlar ishga tushirilishini taʼkidladi. Ayniqsa, investitsiya siyosati, sanoat kooperatsiyasi, energetika va transport infratuzilmasiga alohida eʼtibor qaratilib, bu Qozogʻiston–Oʻzbekiston hamkorligiga yangi imkoniyatlar ochadi. Elchi ekologiya, suv resurslarini boshqarish, qishloq xoʻjaligi va ijtimoiy siyosat sohalarida hamkorlikning muhimligini qayd etdi. Shuningdek, Prezidentning bir palatali Parlamentga oʻtish tashabbusiga toʻxtalib, bu qaror keng jamoatchilik muhokamasi va referendum orqali qabul qilinishini taʼkidladi. “Markaziy Osiyo integratsiyaning tarixiy bosqichini boshdan kechirmoqda. Aynan hozir mintaqaning umumiy farovonligi va barqarorligining poydevori qoʻyilmoqda”, – deya xulosa qildi Elchi Beybit Atamqulov.

Oʻzbekiston Oliy Majlisi Qonunchilik palatasi Xalqaro ishlar, mudofaa va xavfsizlik qoʻmitasi raisining oʻrinbosari Dilorom FAYZIYEVA sunʼiy intellekt va raqamli texnologiyalar rivoji mintaqaviy hamkorlikni mustahkamlash va axborot xavfsizligini birgalikda taʼminlash uchun yangi ufqlar ochayotganini taʼkidladi.

Oʻzbekiston Prezidenti huzuridagi Strategik va mintaqalararo tadqiqotlar instituti direktorining birinchi oʻrinbosari Akramjon NEMATOV Qozogʻistonning raqamli transformatsiya sohasidagi tashabbuslari Markaziy Osiyodagi integratsion jarayonlarning drayveriga aylanishi, yagona raqamli makon yaratish va mintaqa raqobatbardoshligini oshirishga xizmat qilishini qayd etdi. Qozogʻistonning raqamli strategiyalarni ishlab chiqish va sunʼiy intellektni joriy etish tajribasi davlat islohotlarini takomillashtirish va boshqaruv tizimi samaradorligini oshirishda amaliy qoʻllanma boʻlishi mumkin.

Tadbir ishtirokchilari Qozogʻiston va Oʻzbekiston rahbarlari hamda hukumatlari darajasidagi yaqin aloqalar va muntazam tashriflar ikki birodar xalq oʻrtasidagi munosabatlarni chuqurlashtirishga kuchli turtki berayotganini alohida qayd etdilar. Davra suhbati qatnashchilari Qozogʻiston va Oʻzbekiston yagona madaniy kodga ega yaqin qoʻshnilar va strategik ittifoqchilar ekani, ularning hamkorligi ortib borayotgan taraqqiyotni koʻrsatib berayotganini taʼkidlashdi. Murojaat Oʻzbekistonda akkreditatsiyadan oʻtgan diplomatik korpus vakillari orasida ham katta qiziqish uygʻotib, u nafaqat Qozogʻiston, balki butun Markaziy Osiyo rivojlanishidagi muhim jihatlarni yoritib berdi.

Davra suhbatining yakunida Oʻzbekiston va Qozogʻiston oʻrtasidagi oʻzaro tushunish va hamkorlikka intilish faqat mustahkamlanayotgani ayon boʻldi. Qozogʻiston Prezidentining Murojaatida ilgari surilgan tashabbuslar kelajakning strategik qarashlarini namoyon etadi, ular ichki hamda mintaqaviy rivojlanish jihatlarini qamrab oladi. Muhokama ikki tomonlama hamkorlikni yanada chuqurlashtirish zarurligini, umumiy manfaatlar va qadriyatlar, shuningdek mintaqadagi barqarorlik va farovonlikka intilishni taʼkidladi.

“Xalq soʻzi”