Qozoq ijodkorlari soʻnggi paytlarda ajoyib seriallar ishlashmoqda. Shulardan biri “Qara shanыraq”. “Shanыraq” deganda qozoq xalqining oʻtovi tepasidagi moʻrisimon tuynuk tushuniladi. Bundan tashqari, “shanыraq” soʻzi qozoq xalqida xonadon, oilani anglatadi.

Ushbu serial “Mening yurtim” (My5) telekanali orqali 2020-yil 20-aprel soat 22.00 dan boshlab, “Xonadon” nomi bilan efirga uzatilishi rejalashtirilgan.
 

“Xonadon” syujeti markazida uch aka-uka taqdiri yotadi. Ular bir ota-ona farzandi, bir xonadonda ulgʻaygan boʻlishiga qaramay, oʻz hayot yoʻlini izlab, uch tomonga ketishgan. Toʻngʻich oʻgʻil — Alisher biznesmen, omadli top-menejer boʻlib, karyera pillapoyalaridan odimlab ketardi. Shaxsiy hayotida u bir daryoning ikki qirgʻogʻi orasida suzayotgan kemaga oʻxshardi. U muhabbat va mehribonlik orasida qay tomonga oʻtishni bilmay ikkilanardi. Bir tomonda sobiq rafiqasi, sevgan insoni, ikkinchi tomonda hamkasb ayol va uning qizalogʻi turardi. Aslida, Alisher hamkasbining qiziga bogʻlanib qolgan edi, ayolga nisbatan esa faqat hurmat hissini tuyardi. Lekin hamkasbi Karinaning bu boradagi fikrlari butkul boshqacha.

Oʻrtancha oʻgʻil — Daulet boʻydoq, biroz qoʻrs, gʻururli sobiq sportchi, endilikda boks boʻyicha murabbiy. Shu bilan bir qatorda bir dam olish maskanini ijaraga olib, sayyohlik biznesini ham yoʻlga qoʻyishga harakat qilyapti. Mana shu oromgohga tasodifan kelib qolgan qoʻshiqchi qiz Linda uning hayotga boʻlgan nigohini oʻzgartirib yuboradi. U bir yerda turib qolmay, doim izlanish va oldinga intilish kerakligini tushunadi.

Kenja oʻgʻil — Madi esa ota-onasi bilan birga yashaydi, uylangan 2 farzandi bor. U fermer xoʻjaligini boshqarib, otasining ishini davom ettiradi. Ammo uning hayot yoʻlida uchragan turli odamlarning taʼsiri ham boʻladi. Masalan, harbiy xizmatni birga oʻtagan doʻsti Talʼat uni turli shubhali biznesga torta boshlaydi. Madi otasining nazoratitdan xalos boʻlishni istagani uchun ham turli takliflarga rozi boʻladi.

Shuni aytib oʻtish joizki, mazkur filmda ota-ona va farzandlar, va doʻstu birodarlar orasidagi munosabat, oila qadri va urf-odatlar, insonlarning boylikka boʻlgan qiziqishi hamda adolat hissi bizning xalqimiz hayotiga juda yaqin. Bu serial maʼnaviy jihatdan xalqimizga mos boʻlgani uchun voqealarning qizgʻin rivoji manzur keladi, degan umiddamiz.

Serial bir oila hayoti, muammolari va oʻzaro munosabatlari haqida boʻlsa-da, unda har bir odam oʻzi yoki atrofidagilarini koʻrishi mumkin. Film namoyish etayotgan vaziyatlar har bir odamni xulosa chiqarish, fikrlashga undaydi, yosh avlodga esa oila va qadriyatlarni ulugʻlash, qadrlashni oʻrgatadi.