Albatta imkoniyati cheklanganlar ham hayotning toʻlaqonli ishtirokchisidir. Ularning maʼnaviy olamini boyitishga boʻlgan ishtiyoqi, bilishga boʻlgan chanqoqligi boshqa har qanday insonnikidan kammas. Jumladan kitobxonlikda ham. Eʼtirof etish lozimki, aynan shunday yurtdoshlarimiz, ayniqsa yoshi ulugʻ insonlar uchun Alisher Navoiy nomidagi Sirdaryo viloyati axborot- kutubxona markazi tomonidan tashkil etilgan “Mehr kutubxonasi” loyihasi oʻziga xos mehr va eʼtibor timsoliga aylangan.

Ushbu loyiha orqali kutubxonaga mustaqil ravishda borolmaydigan, yoshi katta va nogironligi boʻlgan fuqarolarga kutubxona xizmatlarini uydan turib olish imkoniyati yaratilgan. Kutubxona xodimlari “Mehr kutubxonasi” aʼzolari bilan telefon orqali bogʻlanib, ularning adabiyotlar boʻyicha qiziqishlarini aniqlaydi. Ularning istaklariga mos kitoblar tanlab olinadi, bevosita uylariga olib boriladi.

Mazkur loyihaning gʻoyasi oddiy, ammo katta ahamiyatga ega. Negaki, “Mehr kutubxonasi”ning ishi oddiy kitob topshiruvdan iborat emas, balki shu asnoda kitobxon bilan samimiy suhbatlar, kitoblar haqida fikr almashuvlar ham boʻladi. Qolaversa, yoshi ulugʻ insonlar oʻqigan asarlari haqida nevara-chevaralariga hikoya qilib beradi. Kitobxonlikning behisob foydasi boʻyicha boshqalarga maslahatlar beradi. Muhimi, ushbu xayrli ish tufayli nafaqat maʼnaviy ozuqa oladi, balki oʻzlarining kerakli, qadrlanayotgan inson ekanini yana bir bor his qiladi.

— Bugungi kunda ushbu loyihaga 20 nafar nogironligi bor fuqaro qamrab olingan boʻlib, ularning aksariyatini yoshi ulugʻ kitobsevarlar tashkil etadi, — deydi Sirdaryo viloyati axborot-kutubxona markazining abonementlar sektori mudiri Xurshida Mamatqulova. — Dastlab loyiha doirasida onlayn xizmatlar — “Mehr kutubxonasi” foydalanuvchilarini elektron kitoblar orqali taʼminlash imkoniyati mavjud edi. Afsuski, texnik sabablar tufayli bu yoʻnalish hozirda faoliyatini toʻxtatgan. Ammo shunga qaramay, “Mehr kutubxonasi” oʻzining asosiy yoʻnalishi – kitoblarni bevosita kitobxonning uyiga yetkazish, maʼnaviy muloqot orqali ularga mehr ulashish ishini davom ettirmoqda.

Ha, ushbu loyiha – maʼnaviyat, eʼtibor va inson qadri uchun xizmat qilayotgan amaliy tashabbusdir. Ayniqsa, hayotning turli bosqichida koʻp sinovlarga duch kelgan yoshi ulugʻ insonlar uchun bu loyiha qalbga iliqlik, ruhga orom, fikrga ozuqa boʻlib xizmat qilmoqda. “Mehr kutubxonasi” nafaqat kitob, balki insoniylik, mehr va gʻamxoʻrlik elchisi sifatida yuraklarga yoʻl topmoqda.

Sevara RASULOVA,

Oʻzbekiston jurnalistika va ommaviy

kommunikatsiyalar universiteti 1-bosqich talabasi.